Општинскиот инспекторат со допис денеска ги извести сопствениците на угостителски објекти кои користат јавен простор за поставување на урбана опрема (ресторани, кафулиња, сендвичари, шанкови)  и корисниците на простор на кој се поставени тезги, фрижидери за сладолед и сл., дека најдоцна до среда 30.07.2008, треба да ја измират својата обврска кон локалната самоуправа, согласно потпишаните договори.
   
Во спротивно, кон нив ќе биде поднесена прекршочна  пријава, а опремата ќе им биде отстранета, соопшти општинскиот инспекторат.


Иако Советот на општината уште минатата година ги прецизираше условите за поставување на урбаната опрема, голем дел од сопствениците на тезги и угостителите истата не ја почитуваат, а дел не ги подмируваат ниту обврските кон општината. Од општинскиот инспекторат велат дека преземаат мерки за воведување ред во оваа област, но сопствениците на урбаната опрема при контроли се повлекуваат, за потоа одново да ја постават опремата на саканото место. Затоа инспекторатот побарал асистенција од полицијата со цел да се воведе ред во центарот на Охрид.

Ohridnews