По спроведениот јавен повик за пријавување на доверители и спогодбено откажување на камати како и одобрените финансиски средства од страна на државата со кои делумно се намали долгот на општината, а со цел реализација на процесот на раздолжување, нејзина финансиска консолидација и почеток на нов развоен циклус односно создавање на услови за долгорочно планирање и инвестирање во реализација на проекти, Општина Охрид ја разгледува можноста за долгорочно задолжување.
Согласно законот, општината изготви Физибилити анализа за оправданоста за долгорочно задолжување и ги повикува граѓаните да се вклучат во процесот со искажување на свои ставови, мислења и предлози за издржливоста на одлуката за раздолжување по пат на кредитно задолжување од деловна банка.
Граѓаните, своите ставови, мислења и предлози може да ги достават во електронски формат на официјалната електронска адреса на Секторот за финансиски прашања [email protected] најдоцна до 19 Јули 2021 година, информира локалната самоуправа.
На 20 јули, вторник, со почеток во 12 часот, во големата сала во зградата на општина Охрид ќе се одржи јавна расправа на која ќе се дискутира за придобивките и ризиците од ваквиот начин на раздолжување дадени во објавената физибилити анализа како и заедничко разгледување на мислењата и сугестиите на граѓаните доставени на горенаведената електронска адреса.
OhridNews
