Толкувањето на законското решение за замрзнување на долговите на јавните претпријатија како „голем подарок“ за граѓаните на Охрид од страна на Владата на ВМРО-ДПНЕ е доказ за достигнатиот врв на нивната хипокризија, сметаат од општината Охрид, која денеска преку соопштение реагира на јавно изнесените ставови на владејачката партија. Во соопштението меѓу другото стои:
„Вистината е таа дека двете општински јавни претпријатија имаат долгови заради неможноста да ги наплатат своите милионски побарувања од фирмите, подрачните единици и институциите кои се токму под капата на Владата на ДПМНЕ. Значи она што државата го должи во милионски суми на ЈП „Охридски Комуналец“ и „Проаква“ се крие под тепихот за да се прикаже дека Владата мислела на охридските јавни претпријатија и нивните вработени. Ако вмровската Влада мисли на граѓаните на Охрид, нека си ги плаќа сметките за струјата што ја троши колекторскиот систем за заштита на Езерото а токму тоа е законска должност на државата! Неисполнувањето на нејзините законски обврски и надлежности, се прикажуваат редовно како долг на општинското јавно претпријатие, па за да биде комедијата поголема, сега охридскиот огранок на ДПМНЕ се фали дека одлагањето е подарок. Вистината е и таа дека во својата стратешка определба да го опструира Охрид во децентрализацијата, Владата на ДПМНЕ да можеше, ќе го изземеше Охрид од спомнатиот Закон. Доволен доказ за таквиот третман и однос кон Охрид од страна на Владата на ВМРО-ДПМНЕ е фактот дека само Охрид од поголемите урбани средини во Македонија е оставен во првата фаза на децентрализција, заедно со десеттина рурални општини“ се вели во соопштението.
Според Општина Охрид споменатиот закон е донесен за да се спасат јавните претпријатија во 99 отсто општини во Македонија кои се под капата на ВМРО ДПМНЕ, кои, како што се наведува во соопштението, имаат астрономски долгови.
