Градските советници од опозицијата со барање да се одржи вонредна седница на советот на која заедно би се донела одлука за понатамошната судбина на Мостот на желбите, а на која би се дискутирало и околу најавената изградба на нова пешачка патека. Како што тие велат вчерашните случувања по добивањето на решението за уривање на мостот се несфатливи.

– За нас е сосема неразбирлива одлуката на општинската власт на средина од ионака лошата туристичка сезона да се носи одлука за уривање на мостот. Кон подобра сезона придонесува токму мостот кој со години е вистинска атракција и го користат не само жителите на Канео, туку и голем број од гостите. Нека се закаже дебата во советот и сите заедно да донесеме одлука во кој правец понатаму ќе се одвиваат активностите околу уривањето и градењето на нова патека, вели советникот Јован Стојаноски од СДСМ.

Советниците од опозицијата додаваат дека доколку движењето по мостот е опасно поради одрони, тогаш нека се преземат активности за заштита на мостот.  

– Како може толку години да опстојува нешто што се третира како дивоградба и е надвор од план. Мостот го оправда своето постоење. Преземањето на активности во тек на сезона има негативен исход. Овој мост е од животно значење за граѓаните , има луѓе кои се постари и кои велат дека по поставувањето на мостот за прв пат го виделе Канео. Без да го политизираме настанот, во интерес на граѓаните и гостите, како опозиција цврсто стоиме на ставот дека овој циркус е недозволив.Охрид не смее да стане роб на никакви освети или политички борби, вели советникот Дејан Блажевски од ЛДП .

Во однос на проектот за изградба на нова патека советниците додаваат дека  секогаш би подржале одлука која е во интерес на граѓаните, но откако за проектот ќе се изјаснат екологистите, експертите, граѓаните.

– На последниот состанок на градските татковци, кога имаше поделени мислења околу изградбата на нова патека, градоначалникот вети дека ќе се изврши анкетирање на јавното мислење на граѓаните и стручната јавност. Би сакала да го повикам пред да се пристапи кон градењето да ни се презентира проектот и да го чуеме јавното мислење, рече советничката од НСДП Верица Хајба која смета дека на Охрид му требаат нови пешачки патеки, но според неа поприоритетна е изградба на патека која ќе го поврзи Лабино со Воска и Далјан.

Советничката Жаклина Лазаревска потенцирајќи го значењето на Мостот на желбите, ги повика надлежните да ги запрашаат жителите на Канео колкав е протокот на гости кон населбата по градењето на мостот. Додаде дека доколку постоела добра волја кај локалната власт мостот кој е од општ интерес, иако е дивоградба, можел да се легализира како што претходно се извршила легализација на голем број дивоизградени објекти.

Т.К.