Опаѓа старосната граница на наркозависници во Охрид, предупредува полицијата. Според последната евиденција на Секторот за внатрешни работи од Охрид, на подрачјето од Охридскиот регион регистрирани се вкупно 342 лица, кои се зависници на дроги. Упатените во оваа проблематика велат дека ова не е реалната бројка на зависници и дека истата е најмалку пет пати поголема.
-Повеќе загрижува фактот што според статистичката евиденцијата, имаме пад на старосната граница на лицата кои оствариле контакт и со наркодилерите и кои се регистрирани како наркозависници во нашата служба. На 14-годишна возраст имаме регистрирано лице кое е наркозависник на опојна дрога марихуана, додека на 16 години имаме лице кое е зависник на хероин. -вели Стефан Димоски, портпаролот на СВР Охрид.
Тој ја објаснува дека Охридската полиција континуирано превзема оперативни и превентивни активности, кои се во насока на сузбивање на овој вид на криминалитет.
–Околу две години го спроведуваме проектот „Дрога, вистина и заблуди“. Тоа е еден голем проект во кој до сега се едуцирани околу 25 000 ученици од основните и средните училишта низ Охрид, како и 9 000 нивни родители. Нашите полициски службеници се 24 часа присутни околу училиштата во градот и тоа е една од превентивните активности кои ги спроведуваме. -вели Димоски.
Тој нагласи дека денививе со помош на училишните педагози, психолозите и медиумите, ќе биде заокружен еден дел од реализацијата на овој проект, со што проблемот со зависноста од дрога ќе се подигне на едно повисоко ниво и ќе се направи поширок фронт на борба против ова зло.
