Најдобриот тенисер на светот, Новак Ѓоковиќ, по двонеделната сага во Австралија, денес околу пладне слета на аеродромот во Белград.
Враќањето во Белград на српскиот тенисер предизвика голем интерес. На аеродромот „Никола Тесла“ беа присутни стотина новинарски екипи, како и навивачи кои дојдоа да му изразат поддршка на својот омилен спортист.
Ѓоковиќ кој од Мелбурн преку Дубаи се врати во Белград, дозна дека и на Ролан Гарос ќе можат да играат само вакцинирани тенисери, па Србинот се соочува со пропуштање и на Грен слемот во Париз.
Новак сè уште не се појави да даде изјава, а веќе се шпекулира дека тој веднаш, со друг авион, може да замине за Шпанија каде се наоѓа неговото семејство.
Претходно, австралискиот министер за имиграција Алекс Хоук, на 14 јануари донесе одлука и објави дека визата на Ѓоковиќ е укината по втор пат. Како одговор, Србинот повторно се жалеше до Федералниот суд на Австралија, но жалбата не му беше прифатена.
Според австралиската влада, присуството на Ѓоковиќ во земјата е јавна закана, бидејќи за многумина, особено за луѓето кои не сакаат да се вакцинираат, тој е икона и пример.
OhridNews
