Една од попосетените беше црквата посветена на Свети Ѓорѓи и Успение на Пресвета Богородица во областа Епинг во Мелбурн. Овој храм беше полн со Македонски верници од повеќе генерации наши иселеници, кои ја проследија воскресенската богослужба, палеа свеќи за здравје и среќа, вртеа околу црквата со свечената литија, си го честитаа празникот со поздравот Христос воскресе-Вистина воскресе, се кршеа со Велигденски јајца.
– Иако илјадници километри сме далеку од нашите родни огништа, ги чуваме обичаите и традицијата и со голема почит и воздигнато чувство го славиме нашиот најголем христијански празник Велигден. Секоја година овде има се повеќе верници во нашите Македонски храмови, со што се помасовно и подостоинствено се слави празникот на Христовото воскресение.- ни изјави Васко Ангеловски, иселеник од Охрид.
Македонските иселеници, чиј број на подрачјето на Мелбурн и Викторија се проценува на околу сто илјади, а во цела Австралија на повеќе од триста илјади, денес празнуваа со традиционалната богата Велигденска трпеза, во кругот на најблиските од семејството и пријателите со кои живеат и се дружат во новите домови.
