Викендов на стрелиштето Камник во Скопје во организација на Mакедонската спортска стрелачка федерација се одржа 18-тиот традиционален Меѓународен натпревар во гаѓање со огнено оружје –голем калибар, како и малокалибарна пушка со оптички нишан, на кој учество зедоа повеќе од 100-тина стрелци од државата и надвор од неа.
Стрелците на ЖСК „Лихнидос“ се натпреваруваа во три дисциплини и тоа пиштол и револвер на 25м. како и малокалибарна пушка со оптички нишан на 100 метри.
Во поединечен пласман во дисциплината гаѓање со пиштол на 25 метри-мажи Велибор Балоски се пласира на третата позиција со резултат од 91 круг. Кај жените овојпат и појде од рака на младата Милица Кочовска (јуниорка) која, исто така, се пласира на третата позиција со резултат од 84 кругови. Успехот е дотолку поголем бидејќи овие позиции до сега во принцип беа „резервирани“ за припадниците на посебните единици САЕ-ТИГАР, ЕБР, АРМ, што покажува дека нашите стрелци можат рамо до рамо да се борат за место на пиедесталот и со врвните единици во нашата земја, велат од клубот.
И во екипен пласман во дисциплината револвер на 25 м. второ место за екипата на ЖСК „Лихнидос“ во мешан состав: Велибор Балоски, Валентина Гоџоска и Лазар Кочовски со резултат од 240 кругови.
На третата позиција во екипен пласман-жени во дисциплината пиштол 25 м. повторно се пласира екипата на ЖСК „Лихнидос“ во состав Валентина Гоџоска, Душанка Минева и Милица Кочовска со резултат од 197 кругови.
OhridNews
