Охридските ресторани треба да креираат вински карти, преку кои гостите ќе може да прочитаат нешто повеќе за виното кое што се нуди и да направат посоодветен избор за нарачка, сметаат обучените угостителско-туристички работници.
-Моменталната состојба во однос на винските карти кај нас е очајна. Отвораме листата на пијалоци во рестораните и во некој агол ставени се неколку вина, односно само името на виното, цената и толку. Ништо повеќе за виното, а виното е многу повеќе од обичен пијалок и токму за тоа треба да го третираме на посебен начин, смета дипломираниот менаџер по хотелско ресторанско работење Тони Павловски. Тој заедно со професораката на Факултетот за туризам и угостителство Ангела Василеска, изработиле идејно решение за тоа како би требало да изгледа една винска карта во ресторан.
-Размислувавме како треба да изгледа една винска карта, што треба да содржи, дали да ставиме пообемни карактеристики на секое вино или едноставен и краток текст со најважните карактеристики на виното. Истовремено обрнувавме и големо внимание винската карта да биде интересна за гостите, да уживаат додека ја разгледуваат, да не биде досадна и секако со неа да ги убедиме гостите во рестораните да порачаат вино. Се одлучивме на винската карта да направиме спој на следните три компоненти, храната, виното и историјата, вели Павловски.
Тој објаснува дека големината на винската карта зависи од тоа колкав асортиман на вина има секој ресторан.
-Најважно во изготвување на винската карта е следното, да биде сликовитo прикажано виното, основите карактеристики, од која винарска визба е, која година е произведено, во кој вински регион. Потоа на кратко да бидат прикажани основите карактеристики на виното, со каков вкус се одликува, кои карактеристики ги има, на која температура се служи и слично. Во еден дел од страната посветена на виното да има предлог јадење кое се препорачува со тоа вино и најважнотото еден дел да му се посвети на нашата историја, да има прикажано мотиви од историските моменти карактеристични за нашата земја, предлага Павловски во коордианција со професорката Василевска.
Според идејното решение, прво треба да бидат подредени белите вина, па црвените вина, потоа розе виното и на крај пенливите вина. Исто така во идејното решение се предлага при подредувањето на вината да се стават прво вината од локалните винарски визби, а по нив вината од регионалните винарски визби, па од националните и на крај вината кои се произведени надвор од границите на Република Македонија. Во однос на цената, се предлага прво да се стават скапите вина, па редоследно се до најниската цена.
OhridNews
