По повод 105 годишнината од Илинденското востание седумнаесет млади охриѓани рано утрово тргнаа на Илинденски марш до Крушево, каде на 2 Август ќе се приклучат на центрралната прослава на Илинден. Охридските „комити“ до Крушево ќе минат 102 километри пеш преку селата Куратица, Брежани, Илинска Црква, Мало Илино, Железнец, Деленци, Брезово, Зачле, Дивјаци и други места. Во Крушево се стигнува на 31 јули попладнето.
По повод заминувањето за Крушево, синоќа во црквата Света Тројца во населбата „Радојца Новиќиќ“ се одржа молитва за добар пат на која присуствуваа сите учесници на маршот.
–Целта е да се продолжи традицијата, да се зачува нашата историја и култура и да се пробуди патриотската свест кај младите, велат од здружението на граѓани „Христо Узунов“, кое е организатор на Илинденскиот марш.
Инаку, традицијата започна во 2003 година на прославата на 100-годишнината од Илинденското востание кога група ентузијасти од Охрид пеш тргнаа за Крушево. Оттогаш наваму секоја година младите охриѓани одат по патеките на славните илинденци.
ohridnews
