Децата од египќанската заедница имаат проблеми во основното и средното образование кога се декларираат како Египќани, реагираат од политичката партија Сојузот на Египќани. Во соопштението кое денеска го испратија од партијата до медиумите се вели: Како релевантен политички субјект имаме обврска кон нашиот автохтон народ, јавно да обзнаниме дека во последно време, особено при изјаснување на нашите деца во основното и средното образование за нивната национална припадност, секогаш кога ќе се произнесат како Египќани, наидуваат на негодување, дообјаснување и во крајна линија, неприфаќање како такви. Мислиме дека на тој начин уште на самиот почеток на нивното образование нашите деца се поставени во една многу деликатна состојба и статус на личности кои за да се инкорпорираат во седината мораат да ја преземат улогата на докажувачи на својот идентитет. Должни сме да потенцираме дека согласно Уставот на Република Македонија, секој граѓанин има право да се декларира така како што се чувствува, а како информација за неупатените професори и раководни лица, во Заводот за статистика има посебна графа -Египќани, така што државата на некој начин го има регулирано тоа прашање”, се вели , меѓу другото во соопштението од Сојузот на Египќани.
Од оваа политичка партија сметаат дека не се работи за дискриминација и подмолни игри на одредени центри на политичка моќ и потенцираат дека доколку продолжат ваквите деградирања ќе се преземат и соодветни законски мерки.
Александра Ристоска
