Охриѓанец, засега со непознат идентитет, во повеќе наврати преку измама земал пари од странски државјанки кои престојувале во Охрид. Лажно се претставувал како стилист од Милано, дека работи за невладини организации или дека е вработен во Општата болница во Охрид.
“Се запознавме со момчето, ми се претстави дека се вика Аднан. На почетокот се беше прекрасно, тој е многу упорен, слаткоречив. По извесно време дружење ми вети брак, деца и заедничка иднина. Потоа спомна дека има болна мајка и дека му требаат пари за да плати струја, за да врати некои долгови, за лекови. Ги зеде парите и повеќе не го видов” , вели во својата исповед жената со која контактираше нашата редакција. “ Немам докази и затоа не го пријавив во полиција. Мојот случај не е единствениот, уште многу други жени кои престојувале во Охрид ја имаат доживеано сличната судбина. Мене ме запозна лично, но голем број од нив и преку интернет. Го има на многу социјални сајтови каде ги пронаоѓа жртвите. Од едни позајмува пари, а на други ги троши, а во сето тоа учествува и неговата мајка”, вели оваа жена. “ Навистина би била среќна ако оваа моја исповед послужи како предупредување на други кои можат да дојдат во искушение и да ја доживеат истата судбина”, додава жената која себеси се претставува како жртва на измама.
Од СВР- Охрид велат дека до сега немаат информации за ваков или сличен пријавен случај.
