Во чест на 2-ри април – Светскиот ден на литературата за деца НУ Библиотека „Григор Прличев“ денес организира интересен интерактивен настан во кој се споени литературата и цртањето.
Гостинка во Библиотеката ќе биде поетесата Светлана Каланоска- Котевска од Охрид. Ќе бидат промовирани двете нејзини стихозбирки за деца: „Убава е природата со жуборот на водата“ и „Да растеме заедно“ во издание на Библиотека во 2024 година.
Промотор ќе биде м-р Милчо Јованоски, а библиотекарот Бети Лазеска – Симоноска ќе ги презентира двете рецензии од проф. д-р Елизабета Бандиловска. Промоцијата е со почеток во 12.00 часот во Прличевата одаја.
Претходно во рамките на оваа промоција ќе се одржи ликовна работилница. Ученици од петто одделение од ООУ „Кочо Рацин“ од Охрид предводени од нивната одделенска наставничка Елена Китеска ќе цртаат инспирирани од творештвото на поетесата Светлана Каланоска – Котевска.
Втори април, Денот на литературата за деца за првпат бил прославен во 1967, а оттогаш секоја година во светот се промовира љубовта кон читањето кај децата и се нагласува важноста на книгите.
Датумот го означува роденденот на Ханс Кристијан Андерсен, прочуениот дански автор, познат по делата како „Грдото пајче“, „Малата сирена“, „Девојчето со кибритчиња“ и многу други.
OhridNews
