Вечерва во Центарот за култура, со почеток во 20 часот, премиерно ќе биде прикажан најновиот филм на познатиот македонски режисер, Милчо Манчевски, „Мајки“. На вечерашната проекција се очекува да присуствува дел од актерската екипа.
Мајки е четвртиот по ред филм на Милчо Манчевски од македонско-француско-бугарска копродукција. Снимањето се одвиваше на локации во Скопје, Мариово, Кичево, Тетово и Гостивар минатата година, а монтажата беше завршена летово во Париз, Лондон и Минхен.
Во филмот се испреплетуваат вистинската приказна за отсутна и небрежна мајка, но се работи и за критика на општеството во кое децата беснеат со кредитни картички, старци умираат сами и заборавени, а пензионирани чистачки се жртви на убиства и силувања.
Во филмот играат младите Ана Стојановска и Димитар Ѓорѓиевски, искусните Салетин Билал, Диме Илиев, Владимир Јачев, Марина Поп Панкова, Петар Мирчевски и други познати македонски актери. Директор на фотографија е Владимир Самоиловски. Костимограф е Елизабета Монталдо, дизајнот е на Дејвид Манс, а музиката на Игор Василев Новградска.
Филмот „Мајки“ во Охрид ќе се прикажува до 7-ми ноември во терминот од 20 часот. Влезот чини 100 денари.
