Охрид во бело

Свети Никола со бела брада, вели старата народна поговорка. Дека во тоа има некаква симболика не увери снегот кој на празникот го зафати охридскиот крај. Снежната покривка од неколку сантиметри вчера  го прекри градот. Глетката покрај езеро и украсениот центар беше прекрасна, идилична. Граѓаните го искористија снегот за прошетка на чист воздух, а најмладите да си “мавнат“ по некоја топка снег. Сепак снегот создаде и доста проблеми. Коловозите во градот беа влажни и со остатоци од снег, а во зимски услови се одвива и сообраќајот на магистралниот пат Охрид – Кичево. Поради снегот вчера попладне беше затворен аеродромот „Св. Апостол Павле“. Како што вели една друга народна: „Две убавини не одат заедно“.