Охрид викендов епицентар на забавата

Празникот Илинден вообичаено е врв на туристичкиот шпиц во Охрид. Викендов најубавиот и најголем туристички центар во земјава се очекува да го посетат над 30.000 туристи. Слободни соби во хотелите и приватниот сектор речиси и да нема. На плажите нема каде игла да падне, а во рестораните и кафетериите се чека на ред за маса.

Празничниот викенд во кој се поклонуваме пред спомениците на Илинденското востание и АСНОМ, во Охрид по традиција привлекува голем број гости. Дел од нив овој Илинден имаат навистина голема причина да се тука. На ривиерата како никогаш досега гостуваат светски познати музички имиња и ди-џеи. Забавата ја отвори мегапопуларниот ди-џеј од Бруклин Дејвид Моралес кој настапи ноќеска на плажата Немо. Екипата на Ohridnews го улови Моралес на релаксација во Рибниот ресторан во центарот на Охрид. Дејвид Моралес јадеше салата и се освежи со сок и минерална вода подготвувајчи се за настапот пред охридската публика.

Вечерва на плажата во Далјан започнува Зум фестивалот на кој во наредните два дена ќе настапат триесетина ди-џеи и музички изведувачи.

Шлаг на тортата е концертот на рок ѕвездата Лени Кравиц на стадионот „Билјанини извори“ во недела од 21 часот. Покрај силните светски имиња и настани, исклучителна е понудата и на останатите охридски клубови,  дискотеки и плажи. И овој викенд се разбира во центарот на забавата ќе бидат пријателите на Ohridnews, дискотеката „Парк“ и плажата „Куба Либре“ кои без сомнение се најпосакуваната забавна дестинација во Македонија ова лето. Во „Парк“ викендов настапуваат DJ Power, DJ Juxell и DJ Mirko Popov. Опуштената атмосфера пак на плажата „Куба Либре“ викендов ја надополнува групата Day-Off.