Ракометарите на Охрид со победа ги започнаа натпреварите од плеј-офот во Супер лигата.
Попладнево во Скопје, Охрид го совлада Бутел на гости 20:22, полувреме 8:13.
„Гладијаторите“ одиграа моќно прво полувреме. Чаневски беше одличен на голот, нападот течен и ефикасен за комотна предност од +5 на паузата.
Во вториот дел Бутел го засили темпото. Домаќините заиграа поагресивно и побрзо и почнаа да ја топат предноста на охриѓани. Во финишот на мечот Бутел намали на 18:20, а потоа и на 19:21. На 15 секунди до крајот домаќините заработија исклучување, а Цирар го реализира досудениот пенал за Охрид за конечни 20:22.
Во следното коло, во недела, Охрид во „Билјанини извори“ ја пречекува екипата на Е. Пелистер.
Г.М.
Фото: Архива
