Охрид со двајца претставници на националниот избор на песна за Евровизија

На националнииот избор на песна за Евровизија кој започнува денеска во Скопје, во првата полуфинална вечер ќе настапат двајца охриѓани.

Под реден број 3 ќе настапи раперот Кербер. Песната се вика „Чорбаџија“, текстот е на Климент Србиноски – Кербер, музика и аранжман на Димче Китрозоски, а во кореографијата се вклучени и познатиот пејач Митко Колјушевски и актерите Марко и Јован.

Со големи амбиции на овогодинешниот избор на песна за Евровизија, под реден број 10 ќе настапи популарниот Ѓоко Танески. Тој ќе ја отпее песната „Јас ја имам силата“ за која текстот и музиката ги напиша Кристијан Габроски кој се потпишува и на аранжманот заедно со Дарко Тасев. Во бендот кој ќе го придружува Танески е уште еден охриѓанец – Дамјан Пејчиноски кој свири гитара.

Втората полуфинална вечер е утре, а финалето ќе се одржи во сабота, 20 февруари. Евросонг 2010 ќе се одржи во Осло – Норвешка.