Повеќе од три години по промоцијата на софтверското решение за евидентирање и категоризација на приватното сместување од страна на Секторот за туризам локален економски развој, овој процес во Охрид сеуште трае и не е завршен. Интензивно тој се одвива и оваа туристичка сезона, а според информациите од локалната самоуправа голем број од сопствениците на објекти од мал обем го чекаат крајниот рок (15 август) да извршат пријавување за категоризација.
Според податоците на Секторот за туризам и локален економски развој на Општината (каде и се поднесуваат барањата за категоризација), вкупниот број на категоризирани објекти од мал обем на подрачјето на општината изнесува 1.139 со вкупно 7.021 легло. Од вкупниот број на категоризирани објекти скоро една четвртина, или 326, се категоризирани во оваа година, а бројот на поднесени барања по кои се постапува е 167.
Туристичките работници сметаат дека ова не е ниту половина од капацитетите во приватното сместување со кои располага Охрид. Тие се сомневаат дека процесот на категоризација ќе биде завршен и ова лето, така што туристите кои во иднина ќе доаѓаат во Охрид ќе знаат што им се нуди во приватното сместување. Од локалната информираат дека на терен работат и по три комисии за категоризација и дека се прават напори сите пристигнати пријави за категоризација на приватното сместување да се завршат во предвидениот рок.
