Викендов во градот под Самоиловите тврдини за прв пат ќе се одигра завршницата од ракометниот Куп на Македонија во машка конкуренција.
Охриѓани во „Билјанини Извори“ одблиску ќе имаат можност да ги видат Металург и Вардар кои повеќе од успешно ја претставуваа Македонија и ракометот во Европа и завршија во самиот врв од Европскиот ракометен крем.
Но, на два дена пред почетокот на второто по ранг натпреварување нема „ни трага ни глас“ дека Охрид е домаќин на една таква голема манифестација.
Низ градот нема ниту една плаката или реклама, а Ракометна федерација на Македонија ги заобиколи охридските медиуми кои требаше да го најават ракометниот спектакл.
Најголема дилема имаше околу билетите кои охриѓани ги бараа(т) под дрво и камен, а нема. Единствено можат да се најдат преку интернет страницата Мктикетс, а не и на некоја билетарница.
РФМ од почеток го фаворизираше Охрид за домаќин на Купот и му ја додели организацијата, но македонската куќа на ракометот потоа го заборави.
Исто така куќата на ракомет не закажа официјална пресконференција на која екипите учесници на турнирот ќе ги кажат своите очекувања и амбиции.
Во полуфиналните средби кои се играат в сабота ќе се сретнат Металург – Зомимак (15ч) и Вардар – Тинекс Пролет (17:45ч) додека финалниот натпревар се игра в недела со почеток во (17:45ч).
Михаил Постоловски
