Првиот фестивал на францускиот филм, со кој ќе се збогатува и културната понуда за време на туристичката сезона се отвора вечерва во 20 часот во Центарот за култура „Григор Прличев“, со долгометражниот филм „Живот во розово“ посветен на легендарната Едит Пјаф.Ќе бидат прикажани 11 играни и 4 кусометражни филмови.
Идејата постои од минатата година кога охридскиот градоначалник Александар Петрески, амбасадорот Јордан Плевнеш и директорот на фестивалот, Зоран Велјаноски-Летра престојуваа неколку дена во Париз.
Според, претседателот на советот на фестивалот, Макс Азуле, Охрид одговара за еден ваков настан. Преку него, ќе и се овозможи на публиката да се запознае со популарниот француски филм, ќе се отвори мини-пазар за филмот, но не од комерцијален карактер,а француските и македонските продуценти ќе имаат одлична можност да остварат копродукциски релации.
Потпретседателот на советот на фестивалот, Јордан Плевнеш изрази надеж дека фестивалот ќе стане престижен и еднаков со Канскиот и другите реномирани фестивали во Европа.
Центарот за култура каде што ќе се прикажуваат франкофонските филмови веќе ги заврши подготовките и публиката ќе ја дочека во реновиран ентериер. Според најавите на директорот на фестивалот , Зоран Велјаноски- Летра, филмовите ќе се прикажуваат преку современа техника.
Инаку, буџетот на фестивалот изнесува околу 40 илјади евра.
