Регионалниот патен правец кон Св. Наум ги дочека гостите во очајна состојба.
Безбројните дупки кои го отежнуваат движењето ќе се пополнуваат кога ќе се поправел дефектот во Асфалтната станица во Битола од каде Македонија пат- Охрид го набавува асфалтот. Кога ќе биде отстранет дефектот и дали пред екот на туристичката сезона- не се знае.
Од подружницата во Охрид признаваат дека патот не е во добра состојба и дека е неопходна негова реконструкција и проширување. “ Со оглед на фактот дека во летниот период на овој патен правец дневно минуваат и по 20. 000 или 30. 000 возила, јасно е дека крпењето на дупките не може во голема мера да помогне. Но, за жал поголеми градежни работи на овој потег не се предвидени” , велат од Македонија пат.
Надеж единствено дава најавената изградба на новиот регионален патен правец кон Св. Наум преку планината Галичица. Иако, проектната документација е изработена, конкретни информации за тоа кога би можело да се очекува започнување на реализацијата на овој проект нема.
