На Интернационалната вечер на фестивалот “Охрид фест – охридски трубадури 08” ќе настапат и Deep zone & DJ Балтазар. Тие годинава ја претставуваа Бугарија на Евросонг во Белград со песната “Take me away” (“Земи ме”).
Ако се има предвид дека покрај Deep zone & DJ Балтазар, на фестивалот ќе настапи и Словенката Ребека Дремељ, како и минатогодишниот претставник на Црна Гора, Стеван Феди, може да се заклучи дека годинешните Трубадури ќе бидат како Евросонг! Фестивалот стапи во контакт и со менаџментот на Дима Билан, но поради превисокиот хонорар кој тој го побара, нема да се појави на сцената во Долни Сарај.
Од Советот на фестивалот исто така известуваат дека на 20 јуни (петок) во 11 часот, во Холидеј Ин ќе се одржи Прес конференција, на која ќе бидат соопштени имињата на учесниците во Вечерта на нови ѕвезди, во Фолк вечерта, во Поп вечерта и во Интернационалната вечер на фестивалот “Охрид фест – охридски трубадури 08”. На Пресот ќе бидат соопштени и многу други детали врзани за одбележувањето на јубилејот 15 години “Охрид фест – охридски трубадури”.
Ohridnews
