Светската економија годинава нагло ќе забави поради војната во Украина, која ја намали куповната моќ на граѓаните, а Европа ќе претрпи најтешки последици, предупреди Организацијата за економска соработка и развој (ОЕЦД).

Светската економија годинава ќе порасне за три отсто, проценува ОЕЦД, намалувајќи ја својата декемвриска прогноза за 1,5 процентни поени. Во 2023 година растот би требало малку да забави, на 2,75 отсто, пресмета организацијата во последниот извештај.

Најтешко ќе бидат погодени европските економии, бидејќи тие се најмногу изложени на војната преку увоз на енергија и прием на бегалци.

Економијата на еврозоната годинава ќе порасне за 2,6 отсто, половина помалку од 2021 година, проценува ОЕЦД, а следната година активноста ќе забави на само 1,6 отсто. Се очекува инфлацијата да достигне седум проценти оваа година и да забави до 4,6 проценти во 2023 година.

Германската економија ќе порасне за 1,9 отсто оваа година и 1,7 отсто во 2023 година, бидејќи закрепнувањето од корона-кризата ќе биде попречено од војната во Украина и ембаргото на руската нафта. Се предвидува дека во Франција годинава ќе има раст за 2,4 отсто, што би требало да забави на 1,4 отсто во 2023 година.

Поради војната, италијанскиот БДП ќе порасне за само 2,5 отсто оваа година, по скокот од 6,6 отсто во 2021 година. Ќе забави на 1,2 отсто следната година.

Се очекува Шпанија оваа година да забележи стапка на раст од 2,2 отсто поради зголемената неизвесност, високата инфлација и послабата надворешна побарувачка. Британскиот БДП ќе порасне за 3,6 отсто оваа година и ќе стагнира во 2023 година, покажуваат пресметките на ОЕЦД.

Економијата на САД ќе порасне за 2,5 отсто оваа година, по растот од 5,7 отсто во 2021 година, бидејќи проблемите со снабдувањето, повисоките цени на нафтата и побрзото темпо на нормализирање на монетарната политика ќе ги забават активностите повеќе од очекуваното, соопшти ОЕЦД.

Во 2023 година се проценува дека растот ќе забави на 1,2 отсто.

Јапонија го запре бранот на инфекција со варијантата омикрон на коронавирусот, така што се очекува економијата да порасне за 1,7 проценти оваа година и 1,8 проценти во 2023 година.

Поради пандемските ограничувања, кинеската економија нагло забави и ќе порасне за само 4,4 проценти оваа година, а потоа ќе забрза во 2023 година, со проектирана стапка на раст од 4,9 проценти, проценува ОЕЦД.

Војната во Украина негативно влијае и на индиската економија, со оглед на нејзината зависност од увоз на енергија. Така, растот на индискиот БДП во фискалната 2022 година би требало да забави на 6,9 отсто, и на 6,2 отсто во 2023 година.

Во исто време, руската инвазија врз Украина ги намали надежите дека високата инфлација поттикната од прекините на снабдувањето во пандемијата на Ковид 19 ширум светот наскоро би можела да ослабне.

Со оглед на тоа што Русија и Украина се водечки снабдувачи со многу суровини, нивните цени нагло се зголемија поради војната. Доколку нешто не се преземе, постои голема опасност и од криза во снабдувањето со храна, предупреди ОЕЦД.

OhridNews