Камења и земја се одронија утрово на патниот правец Скопје – Велес, во близина на наплатната рампа пред Велес, поради што сообраќајот во моментот е во прекин. Центарот за управување со кризи, соопшти дека лавина земја паднала утрово околу 9:15 часот. Одроните на земја биле во должина од 20 до 30 метри.
Како што јавува „Макфакс“, екипи на „Македонија пат“ почнале со расчистување на одронот од околу илјада кубни метри карпи и камења.
Одрон на патот Скопје – Велес, сообраќајот во прекин – фото „Макфакс“
Во моментот на одронот, на тоа место за среќа немало возила, а на патот се затекнала полициска патрола, која го забележала одронот и веднаш го стопирала сообраќајот.
Теренот се расчистува внимателно, бидејќи постои опасност од поткопување на земјиштето и појава на нов одрон. Едната коловозна лента во моментот е расчистена но само за пристап на механизацијата.
Сообраќајот понатаму останува затворен, а сите возила се пренасочуваат на патниот правец кон Свети Николе. Екипи на Македонија пат и полициски екипи будно ја следат состојбата и очекуваат дека во наредните 5-6 часа ќе ги расчистат остатоците од одронот, но не може да предвидат кога патот ќе биде прооден за сите возила.
извор: „Макфакс“
