Членовите на Советот за радиодифузија (СРД), Бранко Радовановиќ, проф. Д-р Томе Груевски и Столе Наумов, изразуваат загриженост поради најновите тензии меѓу одредени новинари, што придонесуваат кон создавање недоверба на јавноста во медиумите и нанесуваат штета на новинарската професија.
Како шtо се наведува во писмената изјава на гореспоменатите членови на СРД, програмските стандарди од Законот за радиодифузната дејност ги обврзуваат сите радиодифузери да придонесуваат за негување и развој на хуманите и морални вредности на човекот и заштита на приватноста и достоинството на личноста, да го поттикнуваат духот на толеранцијата, да поттикнуваат заемно почитување и разбирање, да покажуваат чувство за правичност и за одбрана на демократските слободи, да бидат отворени за различни политички мислења и гледишта како и објективно и непристрастно да ги прикажуваат настаните со еднаков третман на различните гледишта и мислења и да овозможат слободно оформување на мислењето на публиката за одделни настани и прашања.
Членовите на СРД, Радовановиќ, Груевски и Наумов ги повикуваат медиумите и новинарите да ги почитуваат програмските стандарди и да избегнуваат речник, што создава атмосфера на поделби и омраза за доброто на професијата и воопшто на демократијата. Истовремено, апелираат до медиумските професионалци и до нивните здруженија да ги зајакнат саморегулаторните механизми со цел унапредување на професионализмот во сферата на медиумите.
извор: „Макфакс“
