Обвинението на Горан Пандев на светската куќа на фудбалот (ФИФА) за манипулација со гласовите за најдобрите во светскиот фудбал ја опкружи целата јавност. Затоа ФИФА излезе со соопштение, во кое се одградува од таквите тези и дека имаат валиден документ на кое стои името на Пандев и гласовите доделени за најдобар тренер и најдобар фудбалер во светот.
– ФИФА поседува потпишани документи од ФФМ со потпис од селекторот, капитенот со печат од националната асоцијација како и потпис од генералниот секретар. Гласовите кои што ние ги објавивме се поклопуваат со документите кои ги добивме од ФФМ – стои во соопштението од ФИФА.
Лавината реакции ја започна португалскиот стратег Жозе Мурињо, кој рече дека признанието за најдобар тренер не значи многу, ако некој го доделува по наредба.
Дополнително “масло во огнот“ дотури Пандев, кога за италијанските медиуми изјави дека ФИФА неговите гласови место на Мурињо и ги доделила на Винсент Дел Боске, кој подоцна победи во изборот за најдобар тренер.
Мх.П.
