Од денес со почеток во 16 часот, со емитување на програма ќе стартува спортско-забавниот канал (МТВ 3) во склоп од Македонската радио и телевизија (МРТВ). Покрај врвен и домашен спорт на каналот ќе се емитуваат атрактивни филмови и серии, квалитетна музика и емисии со забавни содржини.
Со оглед на спортскиот мораториум, МТВ 3 во следниов период ќе емитува репризи од спортските натпревари кои имаат предзнак историски за нашиот спорт и од други големи собири. МТВ 3 во етер ќе влезе со епската победа на Вардар против Барселона во 1/2 финалето во Лигата на Шампиони 2017 година, кога ја наговести титулата во најквалитетеното клупско натпреварување, подоцна освоена со победата над ПСЖ во финалето.
Во период кога се замрени сите спортски, културни, музички и естрадни настани, Јавниот сервис влегува во амбициозен потфат да привлече гледачи коишто по нормализирањето на ситуацијата ќе имаат телевизиска фреквенција со порелаксирана програма.
МРТ-3 нема да биде само спортски канал, но ќе понуди нешто што специјализираните спортски канали во моментов не можат. Како членка на Евровизија, МРТ обезбеди ексклузивна можност да ги реемитува претходните светски фудбалски првенства, додека партнерството со Интернационалниот Олимписки Комитет и дава шанса повторно да и ги понуди на публиката претходните олимписки игри. Затоа, во наредните денови ќе ги освежиме сеќавањата на фудбалскиот Мундијал во Русија 2018 со потсетување на сите 64 натпревари, а ќе се навратиме и на најголемите возбудувања од најатрактивните настани на ЗОИ во Пјонгчанг 2018.
Очекувајќи што поскоро да прекине спортскиот мораториум на глобално ниво, а негувајќи идеја со тек на времето да напредува, да расте и да се надградува, МРТ-3 ќе ги обнови спомените од последниот период и од ракометната ЕХФ Лига на шампионите, од ракометната СЕХА Лига, како и од сите други спортски натпреварувања за коишто располага со ТВ-права за тековнава сезона (кошаркарската НБА лига, хокејарската НХЛ лига, ИСУ сезоната во уметничко лизгање, италијанскиот и францускиот фудбалски шампионат).
Телевизиските права особено за меѓународни настани секогаш се со временски лимитирана важност. Тоа оневозможува МРТ повторно да емитува многу скапоцени материјали од поновата и од постарата документација. Таквата ограниченост за реемитување настани од некогаш е пречка да нурнеме во архивата и уште подлабоко, можеби и повеќе децении наназад. Сепак, тоа отвора можност да и понудиме на јавноста и значителен дел од настаните на домашните спортски терени, на коишто јавниот сервис по традиција им дава публицитет.
Колажниот спортско-забавен карактер на МРТ-3 ќе биде надополнет со избор на квалитетни филмски остварувања и серии, како и со музички и забавни програми во продукција на МРТ коишто при премиерните емитувања имаа силен одек и наидоа на големи симпатии во јавноста.
Сите овие содржини ќе се испреплетуваат во ударниот термин од 16 до 24 часот. Оние коишто ќе го пропуштат првото емитување, ќе имаат уште две можности да ја погледнат истата понуда – од полноќ до 16 часот наредниот ден. – стои во објавата од уредникот на спортско-забавниот канал, Драган Николоски.
Покрај во победата на Вардар против Барселона љубители на спортот ќе имаа можност да го гледаат свеченото отварање на Зимските олимписки игри во Пјонгчанг (2018 година), премиерниот натпревар на Мундијалот во Русија помеѓу Русија и Саудиска Арабија а за крај е филмот „Wonder Woman“.
OhridNews
