Екипата на Охрид е претплатена за реми без голови на гостински терен на почетокот од Втората македонска фудбалска лига-запад. „Рибарите“ со бод се вратија од Кичево ремизирајќи со тимот на Велазерими во 5-та рунда од шампионатот.
Симоновски (3): Со сигурните интервенции на почетокот од натпреварот влеа многу самодоверба во екипата. Секогаш беше на место после ударите кон неговиот погодок и корнерите, кои беа најголема опасност на домашниот состав.
Вељаноски (2,5) – Ариф (2,5): Солидно издание на охридските бекови. Ги затворија офанзивните фудбалери на домаќините. Во фаза на напад учествуваа, но не беа конкретни и опасни.
Трпески (2,5) – Цуцули (3) – Маркоски (3): Одбраната го положи испитот на гостувањето во Кичево. Стоперското трио добро се справи со нападот на Велазерими. Трпески имаше моменти во кои можеше подобро да реагира, додека Цуцули и Маркоски одиграа меч без грешка.
Алији (2,5) – Ѓорѓиески (2,5) – Кочоски (2,5): Во првите 20-тина минути ја изгубија битката во средината од теренот, но потоа делуваа стабилно и ја контролираа играта. Алији беше играчот кој најмногу играше со топка, Кочоски во вистинско време го одигра најдобриот меч сезонава, а Ѓорѓиески требаше и мораше подобро да ги финишира двете шанси кои му се укажаа.
Реџепи (2,5) – Целески (2,5): Постот на напаѓачите продолжи, но голема заслуга имаат за ремито без примен погодок. Реџепи беше опасен по крилните позиции, додека кај Целески видлива беше желбата за игра и за погодок.
Измени:
Дишлиевски (2,5): Влезе во игра во 75-та минута на местото од Ариф. Задачите во формацијата ги одработи максимално добро.
Ристески – Наумовски: Влегоа во завршната фаза од мечот и немаа доволно време да покажат што знаат и умеат.
Бочески (2,5): Тактички добро поставена формација. На теренот ги изваде најдобрите играчи со кои располага. Измените иако ги направи подоцна имаа свој удел во финиширање на натпреварот.
OhridNews
