Годинава нема да има поскапување на учебниците. Сумата што едно семејство пред 1 септември ќе треба да ја издвои за едно дете за учебници и училиштен прибор е од три до шест илјади денари. Во книжарниците цената за комплет учебници и работни листови од прво до четврто одделение чини од 1.700 до 2.500 денари. Комплетот учебници од петто до осмо одделение чини од 3.500 до 5.000 денари. Учебниците од петто до осмо одделение поединечно чинат од 250 до 300 денари, додека цената за работните листови се движи од 130 до 200 денари. Збирка задачи се продава 180 денари. Оваа се сумите за дел од потребните реквизити за следење на наставата.
– Не поскапуваат учебниците бидејќи се користат резервите на стари учебници. Идната година ќе има нови учебници за прво, второ и трето одделение. Сега издавачите ги празнат магацините – велат по книжарниците.
За тетратки, моливи, гуми, блокови, боици и други помагала ќе треба да се издвои сума од најмалку 600 денари. Оваа бројка може да е двојно поголема за повозрасните ученици. Цената на географските атласи се движи околу 500 денари, додека историскиот атлас чини 800 денари. Од 500 до 700 денари се стандардните речници за странски јазици со фонд од
100.000 збора. Цената на ранците оди и до 3.000 денари.
Годинава ќе има две групи првачиња – ученици што лани посетувале подготвителна настава и ученици што првпат годинава тргнуваат на училиште. Дечињата што првпат седнуваат во училишните клупи ќе користат учебници дури во второто полугодие.
Првите четири месеци се предвидени за социјализација, а во секоја од училниците ќе има по седум постери, кои наставничките ќе ги користат за да ги запознаат учениците со секојдневните обврски.
Учениците што лани посетуваа подготвителна настава ќе користат учебници за прво одделение што ги користеле и претходните генерации првачиња.
Овие ученици од наредниот септември ќе бидат трето одделение и ќе се вклучат во деветтолетка.
