Обновено + фото: Охрид на нозе во знак на хуманоста!

10.12.17 16:01

Познати лица од јавниот живот и граѓани на Охрид учествуваа на спортскиот хуманитарен настан, кој, денеска, се одржа во спортско рекреативниот центар „Билјанини Извори“ за поддршка на Јане Велковски и децата со ретки болести. Настанот што организациски го поддржаа локалната самоуправа, ЈП „Билјанини извори“, активистите Гордана Лолеска од „Живот со предизвици“, Ивана Маховска и Влатко Стојкоски, „Супер радио“, со помош на хотел „Нова Ривиера“, лајонс клубот „Лихнидос“, Фудбалската школа Топ Тим Охрид, женскиот ракометен клуб Лихнид, ракометните ветеранки од Охрид и други, како и бројни хумани ентузијасти од нашиот град.

фото: „Мега продукција“

Приказната на Јане Велковски кој боледува од спинална мускулна атрофија не ги остави рамнодушни охриѓани кои се сплотија и му дадоа силен ветар во грб на Јане и на децата со ретки болести.

8-годишниот Јане со капитенската лента на раката и стабилно пред голот го предводеше својот тим до победа и титула во турнирот во фудбал, додека во ракомет без победник заврши средбата помеѓу ЖРК Лихнид и ветеранките од Охрид.

Европската куќа на фудбалот (УЕФА) го вклучи Јане Велковски во кампањата „Еднаква игра“, а Пол Погба ќе му биде специјален домаќин на Јане на еден од натпреварите на Манчестер Јунајтед во Лигата на Шампиони.