Во текот на последните 24 часа, во лабораторијата на Институтот за јавно здравје, добиени се 43 позитивни резултати на новиот тип на вирус А(Х1Н1), од кои 22 лица се на возраст од 15 до 19 години, соопшти Министерството за здравство.
На Клиниката за инфективни болести и фебрилни состојби, во изминатото деноноќие се прегледани 56 пациенти, од кои осум се хоспитализирани. На сите им се земени брисеви за анализа и дадена им е соодветна терапија. Во моментот на Клиниката се хоспитализирани вкупно 20 лица, од кои шест случаи се со полесна форма на пневмонија.
Во текот на денешниот ден редовна средба имаше и Комисијата за пандемски грип, на која присуствуваа и експерти и епидемиолози од други институции, кои веќе имаат претходно искуство со преземање активности за сузбивање пандемии. Комисијата констатирала дека сите досега преземени активности, како и идни мерки за заштита се во согласност со оперативниот план и се во рамки на вообичаени и препорачани мерки за можна епидемија.
