На 19 јули 2008 г. со почеток во 20. 30 часот во охридското село Елшани ќе биде отворена самостојна изложба на фотографии од Мишо Јузмески. Во просториите на Фото галеријата во Елшани ќе бидат изложени осумдесет фотографии преку кои ќе биде претставена повеќегодишната фотографска активност на авторот. Фотографиите се инспирирани од културното и природното наследство на Македонија, старите занаети, животот на село, како и од човекот и разните аспекти на неговото живеење.
Ова е првата позначајна фотографска пројава на авторот кој на македонската културна јавност и е познат повеќе со досегашната дејност во областа на литературата и издаваштвото, како раскажувач, есеист и публицист. Јузмески има објавено три книги и други публикации, а свои текстови има објавувано и во бројни списанија во Македонија и странство.
Изложбата е поддржана од Институтот за традиционални вредности од Охрид и таа всушност претставува дел од повеќегодишната акција за приближување на културата до помалите населени места. Изложбата ќе биде отворена до крајот на летото.
Ohridnews
