Голем дел од охридските  трговците што продаваат детски играчки и реквизити, не работат според  Правилникот за својства на детските играчки, пропишан од страна на  Министерството за економија и Министерството за здравство на Република Македонија. Ова го предупредуваат  од охридските продавници кои работат со сертифицирани  детски  играчки.


-Низ повеќе продавници, на пазарите и на тезгите  низ Охрид се продаваат играчки со сомнителен квалитет и со сомнително потекло. Најчесто истите се без амбалажа или со амбалажа која е несоодветна за таа играчка.  Исто така на играчките не е  назначен составот од кој се направени и возраста на децата кои можат да си играаат со нив. Родителите кои купуваат вакви играчки ризикуваат по здравјето на своето дете, затоа што материјалот од кој е направена играчката може да содржи и отровни материи.-објаснуваат продавачите од неколку охридски продавници, во кои се продаваат оргинални играчки и реквизити за деца.

Тие објаснуваат дека единствена потврда за тоа  дека играчката ги задоволува стандардите  за квалитет на детските реквизити потврдува знакот ЦЕ.


-Овој знак е европски знак за квалитет, кој потврдува дека производот е сигурен и не наштетува на здравјето на луѓето, а тоа го констатирале соодветни надлежни служби. Но  кинеските производители многу често го фалсификуваат овој знак за квалитет и наместо проверен квалитет, ЦЕ-ознаката на кинеските производи значи Кина-експорт.-нагласуваат продавачите на играчки.

Според Правилникот за својствата на детските играчки во Република Македонија, механичките, физичките, хемиските, електричните и хигиенските својства треба да бидат декларативно и уредно истакната на амбалажата од играчката, без разлика на  производителот на истата. Исто така задолжително на видлив дел од амбалажата треба да биде назначена и најниската возраст на детето кое може да си игра со неа.

Е.Е.