Градоначалникот на Охрид, Александар Петрески, вчера од седиштето на ЗЕЛС во Скопје упати критики до Владата дека мерките за стабилизирање на водостојот на Охридското Езеро се задоцнети и несоодветни.
– Брановите ќе бидат уште поголеми и посилни така што поставувањето вреќи на брегот на Охридското Езеро е играчка и тоа е исто како да се браниме со чечкалица од слон. – рече Петрески. Тој предупреди дека во опасност е доведен патот Охрид – Св.Наум, кој е на удар на езерото и побара државата да преземе соодветни мерки за да го заштити.
Според Петрески за да се стабилизра состојбата со високото ниво на езерото потребни се неколку месеци, а за да не се повтори слична ситуација во иднина потребна е подобра грижа за Охридското Езеро. Тоа беше и еден од заклучоците на експертската расправа која викендов ја иницираше локалната самоуправа. Меѓу другото експертите побараа наместо ЕЛЕМ испуштањето на водата од Охридското Езеро да го регулира независна регулаторна комисија, а како една од мерките беше посочена и дислокација на коритото на реката Сатеска.
