Директорката на основното музичко училиште „Методи Патче“, професор Нина Момироска е годинашен добитник на врвната награда „Истакнат музички педагог“, што ја доделува Здружението на музичко-балетски педагози на Македонија, за постигнати особени резултати во стручната работа.
За престижноста на оваа годишна Награда доволно зборува фактот дека Здружението на музичко-балетските педагози е член на европската Асоцијација, а наградата ја доделува според строги критериуми преку кои се мери успешниот придонес во афирмацијата на музичкото и балетско образование.
Професор Момироска со својата педагошка работа е посебно заслужна што веќе подолго време музичкото училиште од Охрид постигнува врвни резултати во соло, групни или оркестарски настапи на меѓународни и државни натпревари и првенства. Плејада ученици од ова училиште токму годинава освоија десетици први места, специјални награди и пофалници во поединечни настапи, а беа и најуспешно училиште на годинешниот државен натпревар на музичките училишта.
Ohridnews
