Николовски: Дисперзирани студии и 10 депанданси на светски Универзитети во Охрид

Повеќе факултети кои во наредниот период ќе се отворат на битолскиот Универзитет, ќе имаат дисперзирани студии во Охрид, најави кандидатот за пратеник од коалицијата „За подобра Македонија“, Александар Николовски. На прес конференцијата што се одржа денеска во Центарот за комуникации на ВМРО ДПМНЕ во Охрид, Николовски најави дека во рамките на возобновениот Свети Климентов Универзитет на Плаошник, ќе бидат отворени 10 депанданси на светски познати универзитети. „Со дел од нив веќе е постигнат договор, но во оваа прилика нема да ги спомнам нивните имиња“, рече Николоски. Тој денеска зборуваше за мерките кои ги предвидува програмата „Преродба во 100 чекори надградена и проширена“ во областа на образованието.

Николовски истакна дека до доаѓањето на ВМРО ДПМНЕ на власт државата за образованието од бруто домашниот производ одвојувала само 3,3%, а оттогаш наваму 5,9% со интенција на пораст. Тој најави отворање на повеќе нови факултети и  Универзитет за информатика на кој во првите 10 години ќе работат светски познати професори. Целта е да го доближиме високото образование до младите и да ги намалиме трошоците за студирање, рече Николовски. Според него потребно е да се промени системот на свеста бидејќи во Македонија има многу малку луѓе со високо образование. Тој се осврна и на реформите во основното и средното образование, најавувајќи дека од наредната школска година ќе започне да се изучуваат веронауката и етиката и ќе завршат сите подготовки за инсталирање на 100.000 компјутери во училиштата. „Не може да има развој без образовани и компетитивни млади луѓе кои ќе бидат способни да се натпреваруваат на европскиот пазар“, рече Николовски.

Кандидатот за пратеник од ВМРО ДПМНЕ најави дека по изборите во Охрид ќе започне изградбата на затворен олимписки базан, а постоечкиот кој е од отворен тип, ќе се реконструира. Николовски најави и изградба на четири тениски игралишта и на две фудбалски игралишта во Охрид и Лескоец, кои како што рече, ќе и бидат отстапени на локалната самоуправа.