Македонија и Грција остануваат на своите добро познати позиции во врска со спорот за името. Ниту денешната трета средба во последните пет месеци на премиерите на Македонија и на Грција, Никола Груевски и Јоргос Папандреу, што се одржа на маргините на ЕУ самитот во Брисел, не донесе суштински поместувања во ставовите околу повеќегодишниот спор.


– Сепак е добро што на вакви средби имаме можност да дискутираме за целото  прашање и добро е што таквите дискусии можат да придонесат за поголемото разбирање, подобра атмосфера и  кон евентуално подобрување на овие позиции. Исто така сметаме дека е корисно да се продолжи  да се одржува македонско – грчкиот дијалог на сите нивоа,  но очекувањата треба да бидат базирани врз основа на  реалноста поврзана со спорот кој не е нов ниту едноставен и бара добра волја од двете страни за да може да се говори за некаков напредок, изјави по средбата македонскиот министер за надворешни работи Антонио Милошоски.


Во врска со предлогот „Северна Македонија“, што како евентуално прифатливо решение на спорот за името деновиве го изнесе алтернативниот грчки министер за надворешни работи, Друцас, македонскиот шеф на дипломатијата со став дека тоа е едностран предлог кој не оди во прилог на изнаоѓање решение за  проблемот, кое, како што рече, треба да биде компромисно, односно прифатливо за двете страни.


Милошоски истакна дека Нимиц се уште не излегол со нов сет идеи за билатералниот спор, но има најава за нови разговори на ниво на преговарачи, кои ќе се одржат во април во Њујорк.

Горан Момироски