Општина Струга бара помош од Министерството за образование во решавањето на просторниот проблем во најголемиот средношколски центар во државата, кој според градските власти е претесен да ги прими сите запишани ученици. Државата треба да помогне во решавање на овој проблем затоа што сега со задолжителното средно образование ионака малите капацитети стануваат уште помали, велат од општината. Таа има намера да ја дисперзира наставата во некој од објектите во сопственост на државата во околината на средношколскиот центар, а како најдобра опција се споменува одморалиштето „Мајски цвет“.
Од Министерството за образование велат дека организацијата на школската мрежа е во надлежност на локалната самоуправа и дека тие ќе ја поддржат секоја нејзина иницијатива која е во согласност со законот.
На предлогот на градските власти негодуваат вработените во одморалиштето кои тврдат дека во 2006 година склучиле договор за закуп со државата во времетраење од 20 години, и дека немаат намера истиот да го раскинат. Сепак градските власти се оптимисти дека државата наскоро ќе го врати во владение споменатиот простор и дека истиот ќе и го отстапи на локалната самоуправа за образовни цели.
Ohridnews
