Македонската фудбалска репрезентација претрпе пораз од репрезентацијата на Словчка со 1-0 на стартот на квалификациите за европското првенство во 2012 година. Избраниците на Мирсад Јонуз пропуштија можност уште во првото коло да се замешаат во трката за едно од местата кои водат на континеталниот собир.


Словаците се израдуваа во самиот финиш

“Жолтите“ на полупразниот стадион во Пасеники не` покажаа фудбалска  вештина и итрина да ја искористат можноста која им ја пружија словаците. Репрезентацијата на Словачка која на последниот Мундијал заврши меѓу најдобрите 16 одигра еден просечен натпревар и беше повеќе од зрела да добие шлаканица од малата Македонија.

Но, “лавовите“ одиграа како мачиња во самиот финиш од мечот кога поради втор жолт картон, автоматски црвен беше исклучен Шиков, по расправијата пожолтеа Пандев и Шток, додека селекторот Мирсад Јонуз беше испратен на трибините. Токму овај момент беше клучниот во мечот, словаците се разбудија, а кај нашите не проработи инаетот и во првата минута од судиското надополнување Холско ја погоди мрежата на несигурниот Нурединовски.

Во неповрат отидоа шансите на Тричковски, Попов, Пандев и Георгиевски. Повеќе од јасно  е дека за исчекор понапред од стандардното четврто место во квалификациите потребни се и победи на гостувањата. Против Словачка приликата е пропуштена, а тешко е да се каже дали такви ќе имаме против Русија и Р. Ирска.

Во второто коло од квалификациите во вторник во Скопје ќе ја пречекаме селекцијата на Ерменија.

М.Постоловски