Поголема контрола и зголемување на општата наутичка култура кај луѓето дава позитивни резултати во смисла на тоа дека не се забележани некои поголеми нарушување во водниот сообраќај, односно штети, повреди или губење животи, вели во изјава за OhridNews раководителот на Капетанија на пристаништа Горан Устијаноски.

Луѓето реално ги сфатија поентите од тоа зошто служи опремата во чамецот и зошто пловните објекти треба да бидат исправни.  Помеѓу 250 до 300 пловила можат да се избројат во каналот Билјанини извори за време на викенд во екот на туристичката сезона. Но, не сите секогаш во исто време се заедно во водите на Охридското езеро, додава Устијаноски.

Во интервјуто за Оhridnews, емитувано деновиве, градоначалникот Константин Георгиески истакна дека менаџирањето со водните површини ќе биде менаџирано согласно Студијата за препрогласување на Охридското Езеро за споменик на природата. Студијата што ја изработува австриска консултанстка куќа предвидува зонирање на природното богатство и строги правила на управување и заштита, вклучително и намалување на загадувањето од пловните објекти, и ќе биде основа за изработка на план за изградба на марина во иднина.

Во студијата се предвидува зони на строга заштита, зони на одржлив развој и зони на активно управување. Идејата на изведувачот е да се изработи една апликација и сите кои имаат пловни објекти да ја инсталираат во своите уреди за да кога со својот пловен објект ќе влезат во зона за строга заштита да им се уклучи аларм за да се повлечат од тоа подрачје. Друг начин е регулирање на делот каде што ќе има транзит на бродови. Студијата е при крај потребни се уште некои финеси да се доврши. Со студијата всушност во иднина ќе се одреди местото каде ќе се изгради марината вели Георгиевски.

Инаку, продолжуваат мерките од 11 до 18 часот за ограничувања на движењата на скутерите од  1 јули до 31 август, со напомена дека и надвор од ограничувањето потребно е да се почитуваат правилата и прописите за пловидба.

Во регистерот на капетанијата има преку 2600 пловни објекти од кои можеби голем дел и не се во употреба но не се ни испишани, па се водат во евиденцијата. Добар дел од нив освен во Охридското езеро се и по вештачките езера, Дојранско и Преспанско езеро.

 

Н.С.Ј.