Пред стручната јавност, надлежните институции и претставници од локалната самоуправа и јавните претпријатија, денес, беше презентиран нацрт финалниот извештај за состојбата во која се наоѓа колекторскиот систем, како и мерките кои се предлагаат за негова реконструкција. Нацрт извештајот го изработија јапонски експертски тимови, како и стручни лица од локалната самоуправа и јавните претпријатија Проаква и Нискоградба и министерството за екологија.
– Владата на РМ од јапонската агенција за меѓународна соработка успеа да издејствува неповратни финансиски средства за изработка на студија за заштита на колекторскиот систем од страна на јапонски консултантски и експертски тимови кои денес се тука и ќе имаат презентација и дискусија со сите надлежни кои се на јавната презентација. Подготовката на студијата започна со едно подготвително истражување и оваа студија се одвиваше во две фази- првата имаше за цел да се потврди состојбата на системот и да се направи преглед на мерки за заштита, а втората фаза опфаќаше изработка на физибилити студија за проекти кои ќе произлезат од наодите од првата фаза, информира градоначалникот Никола Бакрачески.
Она што покажале и извршените испитувања е дека колекторскиот систем кој е изграден пред неколку децении е деградиран, оштетен и итно е потребна негова надоградба, реконструкција и ревитализација.
– Во изминатите месеци експертите утврдија дека најголемиот проблем на колекторскиот систем е неидентификуваната инфилтрација на вода во ситемот кој што предизвикува негово накнадно оптеретување, што како последица има излевање на нетретирани води во Охридското Езеро што е сериозен проблем, потенцира градоначалникот.
Бакрачески потенцира дека за локалната самоуправа и владата, реконструкцијата на колекторскиот систем е приоритетен проект, кој се однесува на заштитата на животаната средина и Охридското Езеро.
Т.К.
