Општина Охрид со соопштение реагира на изнесените ставови и препукувањата во дел од националните медиуми во кои локалната се обвинува за финансирање на одредена  ТВ куќа. Во соопштението се вели:

„Општина Охрид во мандатот на актуелниот градоначалник  Александар Петрески нема платено ни еден денар , ниту има  фактура за реклами или слични пропагандни активности  на ниту еден национален медиум. Тука се вбројуваат и „Сител“ и А-1 и други  ТВ куќи.

Лагата на „Вечер“ и  „Сител“ за наводното финансирање на ТВ А-1 од страна на општина Охрид со наводни 162 илјади евра, преку платена фактура, не само што е обична  глупост и измислица, туку  ја оценуваме како паника на овие медиуми – трабанти на централната власт после објавената анкета за високиот рејтинг кај граѓаните на актуелниот охридски градоначалник.

Со други зборови, објавената лага за наводно финансирање на ТВ А -1 од страна на општина Охрид е почеток на  порано видени некоректни и недолични хајки полни со измислици и озборувања насочени против охридскиот градоначалник кој е кандидиран за вториот мандат. Целта на тоа е како овие трабант-медиуми да му одмогнат на Петрески и да му помогнат со лаги и невистини на неговиот иден противкандидат во трката за градоначалник на Охрид.

Во таа смисла од овие трабанти со предзнак на медиуми  јавноста може  допрва  уште многу бисери да чуе и да чита иако истите немаат никаква вистина, но служат за да се препукнуваат со бизнисменот и сопственик на ТВ А -1 Велија Рамковски“, се вели во соопштението на Општина Охрид.

Ohridnews