Секторот за внатрешни работи Охрид, во 2014 година регистрирал намалување на прекршоци по законот за прекршоци против јавниот ред и мир.

– Според аналитичките податоци, лани во Охрид регистрирани се 292 прекршоци што претставува намалување во однос на 2013 година кога биле евидентирани 396 прекршочни дела. Намален е и бројот на сторителите на прекршоци. Лани вкупно 426 лица сториле разни прекршочни дела додека таа бројка во 2013 година изнесува 536, информира портпаролот на СВР Охрид, Стефан Димоски. 

Во текот на минатата година биле регистрирани 99 случаи на физички напад (99 во 2013 година), 60 случаи на учество, предизвикување и поттикнување друг на тепачка (67 во 2013), 43 оддавање на пијанство (30 во 2013), 24  пријавени настани карање и викање (30 во 2013), 13 прекршоци поврзани со наркотични дроги (51 во 2013), 10-фрлање или кршење на предмети (14 во 2013), 7 прекршоци поврзани со омаловажување државен орган (26 во 2013), 7 прекршоци поврзани со држење куче без заштитна маска (9 во 2013), 6 прекршоци за питачење (6 во 2013), 3 регистрирани прекршоци за присуство на малолетници во угости- телски објекти по 24 часот (17 во 2013), 3 прекршоци за навредување или вршење присилба спрема друг (9 во 2013), 2 случаи на лажно пријавување и лажно претставување (4 во 2013) 2 прекршоци за неовластено пукање од оружје (4 во 2013).    

– Според местото на извршување, 264 прекршоци или 90 % се извршени во градот а 28 прекршоци или 10 % се сторени надвор од градот. Вкупно 162 прекршоци се извршени во градот (188 во 2013), 36 во угостителски објект (68 во 2013), 15 во приватен стан (41 во 2013). 197 прекршоци се извршени од поединец, 62 од две лица  додека 33 прекршоци се сторени од три и повеќе лица. Од нив, 216 сторители биле вработени, 133 невработени и 56 ученици/студенти, велат од СВР Охрид.

Минатата година, до Основен суд во Охрид поднесени се 146 (187 во 2013 година) барања за поведување на прекршочна постапка, против 270 (306 во 2013) сторители за сторени 150 (193 во 2013) прекршоци. До Комисијата за прекршоци поднесени се 115 (170 во 2013) барања за поведување на прекршочна постапка, против 156 (230 во 2013) сторители за сторени 142  (203 во 2013 година) прекршоци.

Главни причини што доведуваат до нарушување на јавниот ред и мир се влошени брачни и семејни односи, нерасчистени имотно–правни  и должничко–доверителни односи,влошена економска состојба, невработеност, алкохолизираност и употребата на наркотични дроги. Од СВР Охрид потенцираат дека во рамки на своето превентивно работење, нивните служби и годинава ќе ги интензивираат напорите за понатамошно намалување на овие прекршоци и одржување стабилност во јавниот ред и мир.

OhridNews