Викендов што измина Охрид беше домаќин на најдобрите спортски риболовци од Македонија. Во саботата беше одржан официјалниот тренинг на патеката предвидена за натпревар, на Кејот во градот. Во неделата се одржа натпреварот во спортски риболов во дисциплината „пливка“ во конкуренција на сениори.
По прв пат во Македонија се одржаа два натпревари во еден. Првиот беше Второто коло од Првата спортско-риболовна лига, во организација на Македонската Риболовна Федрација. Вториот натпревар беше Вториот отворен Куп во спортски риболов „Св. Стефан – Охрид 2014“ во организација на Здружението на риболовци Спортски клуб „Св. Стефан“ од Охрид.
Интересно е да се напомене дека во Лигата учествуваа 15 екипи а на Купот 18 екипи. Сите се натпреваруваа во исто време и на иста патека а резултатите се бодуваа и за двата натпревари. Официјалниот дел на натпреварот започна во утринските часови веднаш по свеченото отварање на Купот на Св. Стефан.
Подготовката на приборот и опремата на самата патека траеше еден час и триесет минути, додека ловењето риба четири часа. Се употребуваа разни должини на риболовните трски, од 2 метра па се до 13 метра.
Во екипна конкуренција распоредот на екипите беше следен:
1 место „Бабуна“ од Велес
2 место „Рибар 2011“ од Скопје
3 место „Бистро“ од Струмица
Првата екипа на Св. Стефан го освои шестото место а втората екипа (каде учествуваа јуниори) четиринаесетото место. Во поедимечна конкуренција редоследот беше следен:
1 место Борче Еленов од „Оскар“ од Кавадарци со улов од 2.070 грама
2 место Горан Цуцулоски од „Рибар 2011“ од Скопје со улов од 1.800 грама
3 место Миланчо Миров од „Бабуна“ од Велес со улов од 1.790 грама
Најдобро пласиран поединец од екипите на Св. Стефан беше Славко Наумоски, на деветото место од вкупно 54 натпреварувачи. Генерален спонзор и за овој настан беше концесионерот на рибниот фонд од Охридското Езеро „Пастрмка 2012“ од Охрид.
Ohridnews
