“ Согласно ингеренциите кои ги има,  државата треба во поголема мера да се залага во однос на заштитата и стопанисувањето со водите од езерото. Ако не е во можност, тогаш да ни ги префрли надлежностите и ни овозможи ние- како Локална самоуправа да се грижиме за езерото”, рече градоначалникот Александар Петрески,  пред  почетокот на прославата на Денот на езерото.

Според Петрески, државата се залага само кога може да извлече некаква корист од тоа, но не и кога треба се заштити езерото или рибниот фонд во него. Петрески нагласува дека сосема е нелогично тоа што централната власт е надлежна да стопанисува со крајбрежјето, плажите, водите од езерото и рибниот фонд.


“ Најголемиот криминал во последните 20 години е направен токму во однос на нивото на езерото кое и во овој момент е околу 20 сантиметри над дозволениот максимум. За тоа некој треба да одговара. Не може една иста институција како што е ЕЛЕМ, во исто време да стопанисува со езерото и да се јавува како регулатор на нивото на водата” , истакна  Петрески.

Градоначалникот додаде дека во текот на последните неколку години направени се голем број проекти за заштита на езерото, но изостанаа резултатите од нивната реализација.

OhridNews