Ниту се отстрани градежниот шут, ниту пак инвеститорот воопшто помислува да го заштити огромното брдо градежен материјал покрај кој секојдневно минуваат голем број луѓе. Огромните количини чакал и песок стојат веќе два месеца зафаќајки половина од патот и речиси прекривајќи неколку дрва. При тоа, како резултат на честите врнежи не е исклучена можноста да дојде до одрон и големите количини песок да затрупаат случаен минувач. Ниту инвеститорот, ниту пак надлежните реагираат на ваквата состојба.
За потсетување, по рушењето на хотел Парк во месец мај , градежниот шут наместо да се депонира на соодветна локација, големи количини бетон беа оставени од страна на хотелот и од време на време се натапкуваа, при тоа формирајќи брдо од шут.
Од општинскиот инспекторат, пред еден месец изјавија дека се превземени соодветни мерки. – На сопственикот на хотел Парк му е укажано дека мора да го отстрани градежниот шут, а издаден е и налог за негово отстранување , за Ohridnews тогаш изјави Танас Танасоски, првиот човек на општинскиот Инспекторат.
И градоначалникот Петрески најави дека ќе се следи ситуацијата околу градежниот шут во Парк со цел да се утврди- дали шутот се третира несоодветно само привремено. Ако тоа потраело подолг период, тогаш од Локалната самоуправа ќе се превземеле соодветни санкции.
Единствена локација на која легално се депонира и чува градежниот шут е депонијата Мауцкер.
