На плоштадот во Охрид ќе никне голем трговски центар?

Новото урбанистичко решение за охридскиот плоштад ги крена на нозе архитектите и професорите од областа на заштита на културното наследство. Велат дека нивниот засега тивок револт можел да  ескалира ако се реализира деталниот урбанистички план кој, според нив, ќе значел сквернавење на срцето на Охрид. На самиот плоштад, на површина од пет илјади метри квадратни е предвидено да се изгради трговски центар.

– Со измените на ДУП од 2000-та година, на површина од 5.000 метри квадратни, во комплексот Летница  предвидено е да се изгради трговско деловен угостителски објект – велат од секторот за урбанизам. Иако првично е предвидено објектот да биде со една спратна висина, со измените на ДУП-от, предвидена е и доградба и негова надградба. 

Архитектите тврдат дека трговскиот центар ќе зафати буквално половина од чаршијата и ќе ги наруши амбиенталните вредности на плоштадот, кој веќе нема да има никаков лик. За нив е несфатливо едно такво здание да никне зад грбот на Св.Климент.

И дел од градските советници обвинуваат дека на седниците на Советот се протнуваат и по 20 урбанистички планови кои се однесуваат на централното градско подрачје.

– Урбанистички планови се носат  без транспарентност, се носат без можност по нив да се реагира да се критикува. Веќе имаме проблем со идентификувањето на Охрид како град заради оваа урбана деградација- вели советникот Дејан Паноски.

Од охридскиот сектор за урбанизам, пак, велат дека просторот ќе бил архитектонски разигран, но за реализација на проектот треба да се произнесат и Завод и музеј и Министерството за култура. Инаку,  неофицијално се дознава дека зад изградбата на трговско-деловниот-угостителски објект стојат имињата на моќни македонски бизнисмени.