Влатко Неделков, најдобриот дефанзивен играч во редовите на АМАК СП, почетоците во кошарката ги направил на 14 годишна возраст а пошироката кошаркарска јавност го знае по настапите во кадетската репрезентација. За себе вели дека е среќен човек „Животот ми е исполнет со кошарката, другарите, пријателите а најсреќен ме прават мојата девојка Соња и тригодишната внука Матеја“
Зад него нестојат големи бројки но публиката го сака поради неговата енергичност, борбеност и желба да се совлада противникот.
– По природа сум темпераментен и за мене нема пораз. Сета таа енергија ја пренесувам на терен. Доколку имам улога во поентирањето на моите соиграчи кои имаат задача да постигнуваат кошеви а тоа најчесто се Џарид и Фрај тогаш навистина сум задоволен од мојата игра без разлика на поените кои ќе се запишат зад моето име , вели велешанецот Влатче кој кошаркарската кариера ја започнал во Жито Вардар, три години потоа поминал во ФОН Струга додека минатата сезона од Фени Индустри премина во АМАК СП.
– Посебно мотивирачки за мене се натпреварите против мојот поранешен тим Фени Индустри. Целиот свој „бес“ го изразив на последниот натпревар кој го одигравме дома и верувајте ми да се победи освојувачот на Купот на Македонија не е мала работа. Од тогаш ме препознаваат на улица и не ретко ме застануваат да ми честитаат за победата и добрата игра, вели Неделков.
За него вистинско задоволство е да се биде дел од тимот кој ја испишува кошаркарската историја во Охрид.
– Играм за охридската публика која дефинитивно е најдобрата во земјава, публика која е најголемиот „виновник“за сите успеси кои ги постигнавме на домашен терен. Охрид дефинитивно станува спортски град што е мотив плус да се постигнуваат резултати.
Неговото мото е „прави се што мислиш дека е добро“ Неподнесува лаги и дволични луѓе па поради тоа среќен е што е опкружен со вистински пријатели.
