На 25 октомври ќе се одржи дигитален конгрес на СДСМ. Првпат во нашата земја, тоа ќе го направи најсилната, најдинамична и најотворена демократска партија, порача генералниот секретар на СДСМ Љупчо Николовски во денешното обраќање.
На овој дигитален конгрес ќе биде даден отчет за досега сработеното, со осврт на изборниот резултат, победата на парламентарните избори и визијата за следниот четиригодишен мандат, даден од граѓаните. Како современа партија која постојано се менува, ќе разговараме за измени и дополнувања на Статутот на СДСМ, за уште поголема демократизација на партијата. За зголемување на директната внатрепартиска демократија, зајакнување на положбата и учеството на жените и младите и процесите на одлучување, рече Николовски.
Тој нагласи дека етичка одговорност на сите членови на СДСМ, согласно највисоките меѓународни стандарди и практики, е нивна заложба која, како што посочи, ќе ја канализираат на соодветен начин.
Со предлог измените првпат во историјата на Република Северна Македонија СДСМ ќе спроведе директен избор на претседател на партија. Членовите лично ќе гласаат на слободни, непосредни, фер и демократски внатрепартиски избори. Најавувам и други измени согласно меѓународните стандарди на социјалдемократијата, како што доликува на една прогресивна партија како СДСМ, истакна Николовски.
Преку низа конкретни примери, додаде тој, СДСМ покажа дека знае да се менува на подобро, во интерес на граѓаните, во интерес на државата, во интерес на демократијата.
OhridNews
